Баррасӣ ва дида баромадани барномаи омӯзишӣ оид ба саводи рақамӣ, кор бо додаҳо ва иттилоот, ҳуввияти рақамӣ, амният ва эҷоди муҳтавои рақамӣ – инҳо аз мавзӯъҳое буданд, ки дар воркшопи чоррӯзаи аз ҷониби Ассотсиатсияи таҳсилоти калонсолони Тоҷикистон ва намояндагии DVV International дар Тоҷикистон дар Маркази таълимии Бонки миллии Тоҷикистон дар Гулистони вилояти Суғд баргузоргардида, мавриди таҳлил ва такмил қарор гирифтанд.
Ҳадафи воркшоп такмили барномаи омӯзишӣ тавассути пешниҳодҳои иштирокчиён оид ба рушди малакаҳои амалӣ барои истифодаи минбаъдаи он дар омӯзишҳо дар самти самаранок ва бехатари истифодаи воситаҳои рақамӣ буд. Дар рафти воркшоп иштирокчиён бо ҳамроҳии гурӯҳи тренерон бо сарварии Асомиддин Атоев на танҳо корҳои амалӣ анҷом доданд, балки инчунин пешниҳод ва тавсияҳои худро барои қулай ва самараноктар кардани барнома баён карданд.
Таваҷҷуҳи махсус ба фарогирӣ дода шуд: маводҳо дар форматҳои дастраси электронӣ омода карда шуданд ва формати интерактивӣ имкон дод, ки ҳар як иштирокчӣ саволҳо диҳад ва пешниҳодҳои худро баён кунад.
Яке аз иштирокчиёни семинар Тимур Абдусамадов қайд кард:
-Барои ташкилоти мо дониш дар бораи ҳифзи додаҳо ва истифодаи абзорҳои рақамӣ хеле муҳим аст. Махсусан муҳокима кардани чӣ гуна такмил додани модул оид ба омӯзишҳои рақамии мавҷуда муфид буд.
Иштирокчии дигар Авазхон Сироҷов афзуд:
-Муҳим буд, ки дарсҳо бо забони фаҳмо буду тавсияҳои амалӣ ҷой доштанд. Мо инчунин тавонистем идеяҳои худро оид ба такмил додани барнома пешниҳод кунем.
Ба гуфтаи созмондиҳандагон воркшоп на танҳо ба баланд бардоштани саводнокии рақамӣ, балки ба такмили барномаҳои омӯзишӣ ва истифодаи минбаъдаи он дар раванди омӯзишҳо равона карда шудааст.
Чорабинии мазкур бо дастгирии Намояндагии DVV International дар Ҷумҳурии Тоҷикистон, ки аз ҷониби Вазорати федеролии Олмон оид ба ҳамкории иқтисодӣ ва рушд (BMZ) маблағгузорӣ мешавад, баргузор гардид.