ИЗҲОРОТИ МАТБУОТӢ
Курсҳои касбомӯзӣ дар муассисаи ислоҳии 3\8-и шаҳри Норак
Душанбе, 21.07.2023
22 июли соли 2023 дар доираи лоиҳаи “Ҳимояи ҳуқуқҳои иҷтимоӣ, иқтисодӣ ва фарҳангии маҳкумшудагон ва собиқ маҳкумшудагон дар Тоҷикистон”дар муассисаи ислоҳии 3\8-и шаҳри Норак миёни 20 нафар занони маҳкумшуда раванди аттестатсияи таълимгирандагони курсҳои касбомӯзии “Қаннодӣ” ва “Ороиши мӯй” баргузор мегардад. Аз моҳи май то июли соли 2023 дар ин муассисаи ислоҳӣ ду курси касбомӯзӣ гузаронида шуд ва ба ҳайси мураббӣ худи занони маҳкумшуда ҷалб гардида буданд.
Мавриди зикр аст, ки қаблан, аз моҳи апрел то майи соли ҷорӣ дар ин муассисаи ислоҳӣ номзадҳои боиқтидор аз ҳисоби занони маҳкумшуда интихоб шуда, онҳоро ҳамчун мураббиёни касбҳои қаннодӣ, ороишгари мӯй ва дӯзандагӣ таълим доданд, ки акнун онҳо худашон метавонанд ба дигар занони маҳкумшуда аз рӯйи ин касбҳо дарс диҳанд. Дар раванди курсҳои касбомӯзӣ ду нафар омӯзгорони муассисаи давлатии «Маркази таълими калонсолони Тоҷикистон» ба мураббиён ёрии роҳнамоӣ расонида, раванди таълимро ислоҳ намуда, барои беҳтар кардани ҷараёни омӯзиш тавсияҳо медоданд.
Фаъолияти мазкур дар чаҳорчӯбаи лоиҳаи «Ҳимояи ҳуқуқҳои иҷтимоӣ, иқтисодӣ ва фарҳангии маҳкумшудагон ва собиқ маҳкумшудагон дар Тоҷикистон», ки аз тарафи Иттиҳоди Аврупо ва Вазорати федералии ҳамкориҳои иқтисодӣ ва рушди Олмон (BMZ) маблағгузорӣ шуда, тавассути Намояндагии DVV International дар Тоҷикистон дар шарикӣ бо ташкилотҳои ҷамъиятии “Ҷаҳон” ва “Идораи ҳуқуқи инсон ва риояи қонуният” татбиқ мегардад, гузаронида мешавад.
Барои дарёфти маълумоти бештар бо Зарина Холиқова, директори Намояндагии DVV International дар Тоҷикистон тариқи почтаи электронии khalikova@dvv-international.tj ё Шаҳло Абдунабизода, директори ТҶ-и “Ҷаҳон” тариқи почтаи электронии ngo.jahon@gmail.com тамос гиред.