27 июли соли равон дар шаҳри Гулистони вилояти Суғд мизи мудаввар оид ба ҷамъбасти лоиҳаи “Рушди деҳаҳои осоишта” баргузор гардид. Лоиҳаи мазкур аз ҷониби намояндагиҳои DVV International дар Тоҷикистон ва Қирғизистон дар ҳамкорӣ бо ташкилоти ҷамъиятии “Ассотсиатсияи таҳсилоти калонсолони Тоҷикистон” дар Тоҷикистон ва иттиҳодияи ҷамъиятии “Youth of Osh” (Ҷавонони Ош) дар Қирғизистон амалӣ шуда буд.
Дар мизи мудаввар намояндагони Мақомоти иҷроияи ҳокимияти давлатии шаҳри Исфара, Намояндагии Иттиҳоди Аврупо дар Тоҷикистон, намояндагиҳои DVV International дар Осиёи Марказӣ ва Тоҷикистон, кормандони лоиҳа ва баҳрагирандагон аз деҳаҳои мақсаднок иштирок доштанд.
Бо хайрамақдам гуфтани меҳмонон Некрӯз Отабеков – мудири бахши сармоягузорӣ ва идораи амволи давлатии Мақомоти иҷроияи ҳокимияти давлатии шаҳри Исфара чунни изҳор дошт: “Дар ҳақиқат лоиҳа таъсири чашмраси худро дар рушди деҳаҳои мақсаднок гузошт. Мехоҳам махсус аз грантҳои хурди иҷтимоӣ ва грантҳои тиҷоратӣ барои занони деҳот ёдовар шавам. Натиҷаи ҳамин грантҳо аст, ки занон дар деҳот соҳиби кор ва имконият барои таъсиси ҷойҳои нави корӣ ба чанд нафари дигар гардиданд. Инчунин дар доираи лоиҳа гузаронидани муколамаи сохтори хусусиву давлатӣ, ки ба фаҳмонда додани паҳлуҳои гуногуни Кодекси нави андози Тоҷикистон ба соҳибкорони маҳаллӣ ва баландбардории донишҳои ҳуқуқии онҳо равона гардид, мувофиқи мақсад буд.
Давиде Казале – атташеи Намояндагии Иттиҳоди Аврупо дар Ҷумҳурии Тоҷикистон оид ба масоили сиёсӣ чунин илова кард: “Лоиҳа мақсади хеле муҳимро дар самти дастгирии ташаббусҳои минтақавӣ ва фаромарзии ҷомеаи шаҳрвандӣ оид ба пешгирии самарабахши ифротгароии хушунатомез дар Осиёи Марказиро дорад. Ҳамаи шарикони лоиҳа корҳои зиёдеро оид ба мустаҳкамнамоии малакаи сокинони деҳаҳои ба тариқи шоҳмот ҷойгиршуда алайҳи истифодаи ифротгароие, ки метавонад ба низоъҳои хушунатомез ва экстремизм оварда расонад, ба анҷом расониданд. Фаъолияти лоиҳаи мазкур дар ҳақиқат амали арзишманд оид ба рушди муколама, беҳтар гардидани муносибатҳои фаромарзӣ ва, дар ниҳоят, мусоидат ба сулҳи устувори ба масъулиятҳои Иттиҳоди Аврупо дар Осиёи Марказӣ мувофиқаткунанда мебошад. Дараҷаи баланди таваҷҷуҳ ба амали лоиҳа дар ҳамаи давраҳои фаъолият шаҳодати муҳимияти он аст.
Никола Фёрингер – мудири минтақавии DVV International оид ба таҳсилот ва таълими калонсолон дар Осиёи Марказӣ ба кори сидқидилонаи кормандони лоиҳа баҳои баланд дода, ба ҳамаи шарикон ва ҷонибҳои ҳавасманд барои ҳиссагузориашон дар амалигашти лоиҳа изҳори сипос кард. Номбурда дар бораи Акдемияи сулҳ барои занони пешво, ки дар он бонувон маҳорату малакаи худро оид ба пешгирии хушунати ифротангез, сулҳофарӣ ва миёнаравӣ сайқал доданд, изҳор назар намуд. Зикр сохт: “Борҳо омӯхта шудааст, ки ширкати занон дар равандҳои сулҳофарӣ барои сулҳу суботи мустаҳкам баъди низоъ зарур мебошад”.
Дар ҷараёни мизи мудаввар кормандони лоиҳа ба ширкатдорон дар бораи фаъолияти давоми 2,5 сол анҷомдодашуда иттилоъ доданд. Ҳамаи чорабиниҳои лоиҳавиеро, ки ба ташаккули неруи қавии дохилии ба пешгирии ифротгароии хушунатомез равона буданд, бо овардани рақамҳо гуфта гузаштанд. Инчунин маълумот оид ба амали ташаббусҳои занон (грантҳои иҷтимоӣ) дода шуд. Зикр гардид, ки ҳамагӣ 6 ташаббус: таҷҳизонидани Хонаҳои саломатӣ дар деҳаҳои Лаккон ва Сомониён, таъмин бо ашёи лозима ва таъмири ошхонаи мактаби миёнаи деҳаи Сомониён, таъмини китобхонаи мактаби Лаккон ва деҳаи Хоҷаи Аъло бо китобҳо, мизу курсӣ, рафҳои китобмонӣ, компютер ва таҷҳизонидани майдончаи варзишии мактаби Хоҷаи Аъло амалӣ карда шуданд. Инчунин иттилоъ вобаста ба маводҳои аёниятии таҳиягардида дода шуд.
Заррина Халикова – директори Намояндагии DVV International дар Тоҷикистон ба баҳрагирандагон муроҷиат намуда, изҳор дошт: “Лоиҳаи “Рушди деҳаҳои осоишта” расман ба охир расид, аммо кор барои рушди деҳаҳо дар минтақаҳои мақсадноки лоиҳа идома меёбад. Идома ёфтани лоиҳа мустақиман аз шумо – баҳрагирандагони он вобаста аст. Барои ин мо бояд маълум намоем, ки дар кадом самтҳо бояд фаъолияти худро идома бахшем, чиро беҳтар ва ё чиро тағйир диҳем”.
Дар анҷоми мизи мудаввар баҳрагирандагони лоиҳа арзи сипоси худро ба маблағгузорони лоиҳа изҳор дошта, андешаҳои худро баён карданд. Аз ҷумла гуфтанд, ки ба шарофати лоиҳаи “Рушди деҳаҳои осоишта” сокинони деҳаҳои Хоҷаи Аъло ва Лаккон ба китобҳои нав дастрасӣ пайдо карданд. Метавон гуфт, ки китобхонаи Хоҷаи Аъло аввалин китобхонаи деҳа дар сатҳи Тоҷикистон аст, ки соҳиби компютер шудааст ва ин ба шарофати лоиҳа ба амал омад. Боиси афсӯс аст, мо натавонистем бо ҳамсоягони худ аз деҳаҳои ҳаммарзи Қирғизистон чорабиниҳоро якҷоя гузаронем. Боварӣ дорем, ин гуна имконият дар оянда ба миён меояд.
Зикр кардан ба маврид аст, ки лоиҳаи “Рушди деҳаҳои осоишта” аз ҷониби Иттиҳоди Аврупо ва Вазорати федералии Олмон оид ба ҳамкории иқтисодӣ ва рушд маблағгузорӣ карда мешавад. Муҳтавои маводи мазкур масъулияти муаллиф буда, нуқтаи назари маблағгузоронро инъикос намекунад.