Аз 29 то 31 майи соли равон дар меҳмонхонаи «Пойтахт»-и шаҳри Душанбе тренинги махсусиятҳои равоншиносии ислоҳӣ амалӣ гашт.
Тренинги «Махсусиятҳои равоншиносии ислоҳӣ» ба кормандони соҳаи ислоҳӣ, роҳбарияти шуъбаҳои маҳбусӣ, сардорони отрядҳо ва кормандоне, ки бевосита бо маҳкумшудагон кор мекунанд, равона шудааст. Ба ҳайси тренерон роҳбари Институти шахсият ва саломатии равонии Республикаи Қирғизистон, рӯҳшинос Асанов Тынчтыкбек, психотерапевти Институти мазкур Парпиева Аида ва устоди кафедраи психологияи факултаи философияи ДМТ Давлатов Муҳамадулло ҷалб карда шуда буданд.
Мақсади асосии тренинг пешниҳоди маълумоти базавӣ оид ба назарияи равоншиносии ислоҳӣ, пешниҳоди роҳҳои муосири ҳалли мушкилоти азнавбарқарорнамоии маҳкумшудагон ва такмили донишҳо ҳангоми суҳбат бо ашхоси маҳбус арзёбӣ мешавад.
Тибқи нақша, дар анҷоми тренинги мазкур иштирокчиён донишҳои муосир оид ба асос ва махсусиятҳои равоншиносии ислоҳӣ гирифта, дар натиҷаи корҳои амалӣ фаъолияти кормандон бо маҳбусон беҳтар мешавад.
Боиси зикр аст, ки тренинги мазкур дар доираи лоиҳаи «Ҳуқуқҳои иҷтимоӣ-иқтисодӣ ва фарҳангии маҳкумшудагон ва собиқ маҳкумшудагон дар Тоҷикистон» гузаронда мешавад, ки аз ҷониби Иттиҳоди Аврупо маблағгузорӣ шуда, аз тарафи DVV International амалӣ мегардад.