2-юми сентябри соли ҷорӣ Маркази таълими калонсолони маҳаллӣ дар ноҳияи Панҷи вилояти Хатлон ба истифода дода шуд.
Дар маросими расмии ифтитоҳи он сарвазири мамлакат Қоҳир Расулзода, раиси вилояти Хатлон Давлаталӣ Саид, вазири меҳнат, муҳоҷират ва шуғли аҳолӣ Ҳасанзода Гулнора Кенҷа, вазири рушди иқтисод ва савдо Завқӣ Завқизода ва раиси ноҳияи Панҷ Шоҳиён Зарифхӯҷа Фақер иштирок намуданд.
Маркази таълими калонсолони маҳаллӣ дар ошёнаи якуми бинои навбунёди маъмурии шуъбаи Агентии меҳнат ва шуғли аҳолии ноҳияи Панҷ ҷойгир буда, аз утоқи корӣ, чор синфхонаи таълимии касбомӯзӣ -дӯзандагӣ, қаннодӣ, кампютерӣ ва кафшергари барқӣ иборат мебошад.
Синфхонаҳои маркази номбурдаро ТҶ “Маркази фарҳангӣ-омӯзишии Томирис” бо дастгирии намояндагии DVV International дар Ҷумҳурии Тоҷикистон ва сарпарастии Вазорати федеролии Олмон оид ба ҳамкории иқтисодӣ ва рушд (BMZ) бо тамоми таҷҳизоту лавозимоти замонавии касбомӯзӣ таъмин намудааст, то сокинони ноҳияи Панҷ аз онҳо дуруст истифода бурда, соҳибҳунар гарданд ва ба ин васила сатҳи зиндагии худро беҳтар намоянд.
Зимни боздид аз синфхонаҳои таълимӣ сарвазири мамлакат Қоҳир Расулзода ба шароиту имконоти фароҳамгардида ба касбомӯзон баҳои баланд дода, барои ҳамкории самарабахш ба шарикони рушд аз ҷумла Ташкилоти Ҷамъиятии “Маркази фарҳангӣ-омӯзишии Томирис” ва намояндагии DVV International дар Ҷумҳурии Тоҷикистон аз номи Ҳукумати кишвар изҳори сипос намуд.
Гуфта шуд, ки бинои мазкур аз сеошёна буда, аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон дар доираи нақшаи чорабиниҳои Мақомоти иҷроияи ҳокимияти давлатии ноҳияи Панҷ бахшида ба 35-солагии Истиқлолияти давлатии Ҷумҳурии Тоҷикистон бунёд гардидааст.
Ёдовар мешавем, ки Маркази таълими калонсолони маҳаллии ноҳияи Панҷ (МТКМ) дар заминаи намояндагии Муассисаи давлатии “Маркази таълими калонсолони Тоҷикистон”-и Вазорати меҳнат, муҳоҷират ва шуғли аҳолии Ҷумҳурии Тоҷикистон бо ташаббуси ТҶ “Маркази фарҳангӣ-омӯзишии Томирис” ва дастгирии намояндагии DVV International дар Ҷумҳурии Тоҷикистон ва сарпарастии Вазорати федеролии Олмон оид ба ҳамкории иқтисодӣ ва рушд (BMZ) таъсис ёфтааст.
ИФТИТОҲИ МАРКАЗИ ТАЪЛИМИ КАЛОНСОЛОНИ МАҲАЛЛӢ ДАР Н.ПАНҶ
